УИХ-ын гишүүд ингэж өрсөлдөж, мэтгэлцэж байсан нь тун ховор. Бараг л санал зөрөлдөж зөрөлдөж байгаагүй  дээ.

Өчигдрийн чуулганы нэгдсэн хуралдаанаар УИХ-ын сонгуулийн тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийсэн. Энэ үеэр МАН-ынхан хорондоо түр тар хийж, харин сөрөг хүчин жуумалзасхийгээд сууж байв. “Зэрэг”, “зэрэгц” команд өгсөн мэт ярсхийтэл гараа өргөөд юуг ч байсан улаан гэрлээр ч хамаагүй шуугиулаад баталдаг МАН-ыхан толхиолцож мэдэхээр байна.  

Шалтаг нь “Жагсаалтаар нэр дэвшигч 48-ын сурталчилгааг улс төрийн нам хариуцна” гэсэн агуулгатай заалт илт шүүмжлэл дагуулсан явдал.

Энэ тухай Ч.Хүрэлбаатар гишүүн  “Нам зөвхөн жагсаалтаар орж ирсэн нэр дэвшигчийн сурталчилгааг явуулж тойрогт очсон мань мэтийгээ хаяж байгаа юм байна...” гэсэн бол С.Бямбацогт гишүүн  “Тойрог ярихгүй, жалга дов ярихгүй, улс орны эрх ашиг, хөгжлийн бодлого ярьдаг гишүүдтэй болъё, тэднийгээ жагсаалтаар сонгодог болъё”  гэж ҮХ-даа өөрчлөлт оруулсан.

2012 онд сонгуулийг холимог тогтолцоогоор явуулахад “Хөгөөд хаалгаар гаргасан хүмүүс нь тооноор ороод ирсэн. Намын нэрээр янз бүрийн хүмүүс ороод ирсэн нь үнэн. Тэгвэл энэ алдааг одоо давтах гээд байна. Бас жагсаалтаар орж ирсэн хүн ямар ч зардал гаргахгүйгээр сурталчилгаагаа хийлгэх нь. Өөрөөр хэлбэл “Та нар гуйж байгаад оруулсан биз дээ. Би мөнгө гаргахгүй гэх нь байна. Бас тэд ард түмнээс сонгогдоогүй, амлалт аваагүй, үүрэг хүлээгээгүй хүмүүс орж ирж байна гэсэн үг” гэж бачуурав.

Харин гишүүн Ж.Бат-Эрдэнэ овоо зэгсэн зөв дуугарна билээ. Тэрбээр “Орж ирсэн хуулийн төсөлд гонсгор байна. Олон намын тогтолцоо руу оръё, бие даагч  орж ирэх боломжийг нээж өгье гэсэн... Нэг нам дангаараа ялдаг, засагладаг байдлаас гаръя. Улс эх орныхоо эрх ашгийг намынхаа эрх ашийн өмнө тавъя гэж ярьсан биз дээ. Одоо тэгээд юунаас нь айгаад байгаа юм. Өөрчилье л дөө. Хэдхэн хоногийн өмнө сонгогчидтойгоо ярьсан зүйлийнхээ эсрэг конп дарах гээд сууж байгааг ёстой ойлгохгүй байна...” гэсэн нь  энэ намд бас  бяцхан ардчилал бийг харуулна билээ.

Уг нь ард олны зүгээс шударга, нэр цэвэр, гар цэвэр, Монгол Улсын төлөө чин сэтгэлээсээ ажиллаж, оюун ухаанаа уралдуулан ажиллаж чадах тийм л  гишүүнийг олж сонгохыг хичээж буй. Гэтэл МАН-ыхан өвөр хоорондоо жийлцээд эхэллээ.