Бельгийн алдарт паралимпийн тамирчин Марике Вервортийн амьдралын талаар кино найруулагч Пола Рапапорт баримтат кино бүтээжээ. Марике Вервортийн хувьд эдгэрэшгүй булчингийн өвчинтэйгээ олон жилийн туршид тэмцэж байв.

Тэрээр 2012 оны Лондонгийн Паралимпаас алтан медаль, Риогийн Паралимпаас мөнгөн медаль хүртэж байсан хүчирхэг, чадварлаг тамирчдын нэг байсан юм.

Марике Верворт найруулагч Пола Рапапортод “Бүгд л надаас чи хэзээ үхэх вэ, үхэх цаг чинь аль хэдийн болчихсон уу гэж асуудаг байсан” гэж ярьж байсан бөгөөд өвчин нь цаг минут тутамд түүнийг шаналгаж, унтахад ч хэцүү болгож байсан гэдэг. Тиймдээ ч тэр амиа хорлох талаар бодож, эвтанази хийлгэх хүсэлт хүртэл гаргаж байжээ.

Вервортыг өсвөр наснаас нь хойш саажилт үүсгэдэг өвчин нь зовоож байсан ч тэр тэргэнцэртэй сагсан бөмбөг, усанд сэлэлт, триатлоны спортоор хичээллэх болсноор итгэл найдвар нь бага ч гэсэн сэргэж эхэлсэн юм.

Найруулагч Пола Рапапорт баримтат киноныхоо гол санааны талаар ярихдаа “Хэрэв хүн өөрийн бие сэтгэл, оюун санаагаа хянаж чадвал энэ нь түүнд амьдрах эрх чөлөөг өгдөг. Үүгээр зогсохгүй амьдралынхаа төгсгөлд шийдвэр гаргахдаа ч хянаж чаддаг” гэж хэлжээ.

2019 онд найз нөхөд, гэр бүлийнхэнтэйгээ хийсэн жижиг үдэшлэгийн дараа Верворт 40 настайдаа Бельгийн Диест дэх гэртээ эвтанази хийлгэж нас барсан бөгөөд түүний амжилт өнөөдөр ч гэсэн триатлоны тамирчид дунд домог болон яригдсаар байна.

                                                                                                                                                                                                             Эх сурвалж: CNN