“Сибирийн хүч-2” хий дамжуулах хоолойг монголын газар нутгийн аль хэсгээр дамжин өнгөрөх асуудлыг ОХУ болон БНХАУ уг төслийн зарцуулалттай холбогдуулан харилцан тохиролцоонд хүрсэний дараа шийднэ гэж Монгол Улсын ерөнхий сайд Л.Оюун-Эрдэнэ REUTERS агентлагт ярилцлага өгчээ.

ОХУ энэхүү хийн хоолойг 2030 он гэхэд бүрэн тавьж дуусахаар төлөвлөж байгаа юм. Мөн нийт экспортынхоо 80 гаруй хувийг БНХАУ руу гаргадаг Монгол Улсын хувьд худалдаа, уул уурхайн хамтын ажиллагаагаа БНХАУ болон ОХУ-аас гадна гуравдагч хөрш орнуудтай өргөжүүлэхээр ажиллаж байгааг онцолжээ. Тухайлбал Ерөнхий сайд Л.Оюун- Эрдэнэ ГХЭ-ийн салбарт хамтран ажиллахаар яриа хэлэлцээрүүд хийгдэж байгаа төдийгүй зэсийн үйлдвэрлэлийн талаар Герман, Франц улстай, хувийн хэвшлүүдийн хамтын ажиллагааны хүрээнд Япон, БНСУ-тай харилцаагаа тэлж байгаа хэмээн дурджээ.

Мөн тэрбээр ДНБ-ний дөрөвний нэг, экспортын 93 орчим хувийг уул уурхайн салбар дангаараа эзэлдэг тул Монгол Улс эдийн засгаа түүхий эдийн зах зээлийн ханшийн тогтворгүй байдлаас хамгаалах шинэчлэл хийж байна гэдгийг тодотгосон байна.