Хөдөөгийн сэргэлт ярьж буй энэ цаг үед шаардлага нэртэй шантаажлагчдыг үгүй хийж, сэтгэлгээг нь өөрчилмөөр байна. Орон нутагт бүтээн байгуулалт, уул уурхайн үйл ажиллагаа явуулах гэхээр гэнэт л газар нутгаа хамгаалж байна гээд жагсаад эхэлдэг. Угтаа бол тэгж малчдын нэрийг барьсан бүлэглэл бий болж, шантаажлагчид олширсон.

Өнгөрсөн хугацаанд Эрдэнэбүрэнгийн усан цахилгаан станцын ажлыг эхлүүлэх гэж ямархан “дажин” боллоо. Бүр байтлаа сумын Засаг дарга нь өмнөд хөршийн Элчин сайдын яаманд дур мэдэн албан бичиг илгээсэн байдаг.

Төр, засгийн зүгээс цахилгааны хараат байдлаас гарах, цаашдын үр дүнг нь тооцож үзээд Эрдэнэбүрэнгийн станцыг барихаар төлөвлөчхөөд байхад шүү дээ. Тиймдээ ч муйхарлан дайрсан Засаг даргыг ажлаас нь чөлөөлж, дараагийн удаа нийтийн эрх ашиг болон улс, орны нийгэм, эдийн засагт чухал нөлөөтэй бүтээн байгуулалтын ажилд саад болсон хэнбугайтай ч байсан хатуу ярина гэдгээ Ерөнхий сайд Л.Оюун-Эрдэнэ мэдэгдээд байгаа.

Яг үүнтэй адил муйхарлан эсэргүүцэж, жагсагчдын ажил хаврын улиралд эхэлдэг. Тодруулбал, энэ сарын 13 буюу даваа гарагт Өвөрхангай аймгийн Баян-Өндөр, Бүрд сумын малчид хэвлэлийн бага хурал хийснийг олон нийт санаж байгаа биз ээ.

Орон нутгийн малчдын нэрийг барьж шаардлага хүргүүлж буй мэт шантааж хийгчид өмнө нь үйл ажиллагаа нь эхэлчихсэн ажил үйлчилгээг зогсоож, гацаадаг байсан. Одоо бол арга нь нарийсаад, төлөвлөгөө боловсруулж, хэзээ, хэн, хэрхэн ашиглах нь тодорхойгүй, тэр байтугай нөөц нь ч тогтоогдоогүй лиценз барьчихсан дайрч байна билээ.

Хаврын мал төллөлт, хахирган цаг гээд малчдын хувьд хийх ажил мундахгүй их. Зуд турхнаас эхлээд төрийн анхан шатны байгууллагынхан ч борив бохисхийлгүй ажиллаж байна. Гэтэл Өвөрхангайн Баян-Өндөр, Бүрд сумдын Засаг дарга нар малчидтайгаа нэгдчихсэн эсэргүүцлээ илэрхийлэх нэрээр улстөржчихсөн явна.

Уг нь орон нутаг дахь Байгаль орчны байцаагч нар нь “Сум орон нутагт уул уурхай, орд лиценз хөндсөн ямар ч ажил явагдаагүй. Ганц нэг лиценз байдаг ч сүүлийн 10 жил хэн ч ирж тойроогүй мартагдсан. Нутгийн иргэд, малчид тайван байна” гэж байгаа юм.

Гэтэл дээрх сумдын дарга нар өөрсдийн халаасны хэдэн хүнтэйгээ ашиг сонирхолдоо хөтлөгдөн нийслэлд ирж, шаардлага нэртэй шантаажны ажлаа хийж байна.

Угаас улс зөв жишгээр уул уурхайгаа хөгжүүлж чадвар сум, орон нутагт үр өгөөжтэйг хэнбугай ч харж байгаа. Энгийн жишээ нь Өмнөговь аймаг, Цогтцэций сум.

Түүнтэй адил уул уурхайг хөгжүүлж, зам, барилгын бүтээн байгуулалтын ажлуудаа үргэлжлүүлэх шаардлага тулгараад байгааг хүн бүр хүлээн зөвшөөрөх учиртай.

Харин орон нутагт нэгэнтээ зөвшөөрөгдсөн үйл ажиллагаа, ажил албыг саатуулж, саад тотгор учруулдаг, зохион байгуулалтад орж ШАНТААЖ хийдэг малчид, тэдний нэр барьсан нөхдөд ЭРҮҮГИЙН хариуцлага хүлээлгэнэ гэсэн ам өчгөө АЖИЛ болгох цаг болчхоод байна, Ерөнхий сайд аа.