Эрх баригч МАН-ын Засгийн газар дахиад сэлгээ хийх нь ээ. Өмнө нь дотроосоо хөнтөрч байсан бол энэ удаа мөн л тэдний захиалгаар АН-ынхан “гүйцэтгэх ажиллагаа”-г нь зохион байгуулах нь.

Тодруулбал, Ерөнхий сайд Л.Оюун-Эрдэнийг албан тушаалаасаа огцрохыг шаардан УИХ-ын гишүүн гарын үсэг цуглуулж эхэлсэн байна. УИХ дахь АН-ын бүлгийн 11 гишүүн болон УИХ-ын гишүүн Н.Алтанхуяг, С.Ганбаатар, Т.Доржханд нар гарын үсэг зуржээ. Тэднээс гадна МАН-ын бүлгийн дөрвөн гишүүн “Л.Оюун-Эрдэнийг Ерөнхий сайдын албан тушаалаас нь огцруулах тухай” бичгийг дэмжин гарын үсэг зураад байгаа аж.

Өнөөгийн нөхцөл байдлыг харахад Л.Оюун-Эрдэнийг огцруулах хангалттай шалтгаан бий. Тэр ковидгүй зун болгох нэрээр вакцинжуулалтын ажлыг эрчимжүүллээ гэсэн. Харамсалтай нь вакцины нөөцгүй болгож, гал алдуулсан. Коронавирусээр нас барагсадын тоо өдрөөс өдөрт нэмэгдсэн хэр нь тодорхой хариу арга хэмжээ аваагүй. Эдийн засгийг бүрдүүлэг ихэнх хувийн хэвшил дампуурч шатахууны үнийн өсөлттэй холбоотойгоор өргөн хэрэглээний бараа бүтээгдэхүүний үнэ зогсолтгүйгээр нэмэгдэж байна.

Энэ хэвээр үргэлжилбэл, монголчуудын эдийн засгийн нөхцөл байдал улам бүр доройтно. Гэтэл үүнийг зохицуулах ёстой Ерөнхий сайд, МАН-ын дарга Л.Оюун-Эрдэнэ хэдэн үйлдвэр, сургууль, цэцэрлэгийн үйл ажиллагаатай танилцах нэрээр хэсч явахаас хэтрэхгүй байгаа нь чадамжгүй гэдгийнх нь баталгаа.

Тиймээс намын бүлгийн гишүүд нь ч Л.Оюун-Эрдэнийг үдэж өгөхийг хүсэх болсон аж. Ямартай ч МАН-ынхан өөрсдөө “сууриа цутгаж” чадахгүй байсан Л.Оюун-Эрдэнийг огцруулах асуудлыг АН-ынхан эхлүүллээ. Түүгээр ч зогсохгүй МАН-ын бүлгийн дөрөв цаашид ч нэмэгдэх гэнэ.

Учир нь, МАН-ын бүлгийн гишүүд ядаж тойрогтоо нэр хүндтэйгээ үлдэхийн тулд Ерөнхий сайдыг огцруулах нь зөв гэж ярилцжээ.